Bakı Biznes Universitetinin koordinatoru olduğu “Azərbaycanda Rektorlar Konfransının yaradılması” (ECAR) adlı Erasmus+ layihəsi çərçivəsində 24 fevral 2022-ci il tarixində Bakı Mühəndislik Universitetində təlim keçirilib. Təlimdə Təhsil Nazirliyi və tərəfdaş universitetlərin nümayəndələri, Lənkəran Dövlət Universitetindən Tədrisin təşkili və təlim texnologyaları üzrə prorektor dos. İdrak Əsgərov iştirak edib.

BMU-nun rektoru, professor Havar Məmmədov layihənin önəmindən danışaraq əsas hədəfin Azərbaycanda ali təhsilin keyfiyyətinin yaxşılaşdırılması və Avropa təhsil sisteminə inteqrasiyası məqsədilə universitet rektorlarının fəaliyyətinin əlaqələndirilməsi olduğunu vurğulayıb. Rektor layihənin beynəlxalq əhəmiyyətinə və ali təhsil müəssisələrinin inkişafına verəcəyi töhfələrə də toxunaraq Rektorlar Konfransının Azərbaycan ali təhsil müəssisələrinin beynəlxalq aləmdə təmsil olunmasına zəmin yaradacağını bildirib.

Bakı Biznes Universitetinin rektoru, i.e.d.,professor İbad Abbasov Rektorlar Konfransı vasitəsilə universitetlər və digər tərəfdaş qurumlar arasında milli şəbəkə və əməkdaşlığı inkişaf etdirməyin vacibliyindən danışıb.

Təhsil nazirinin müşaviri Nicat Məmmədli təşkil olunan təlimin əhəmiyyətini vurğulayıb, layihə çərçivəsində görülən bütün fəaliyyətlərin yerli universitetlərin təhsil proqramlarının beynəlmiləlləşməsinə və universitetlərin rəqabət qabiliyyətinin yüksəldilməsinə əsaslı dəstək olacağını bildirib.

Tədbirə onlayn formada qatılan Mərkəzi Oklahoma Universitetinin Transformativ Tədris və Təlimdə Mükəmməllik Mərkəzinin icraçı direktoru Jeff King “Transformativ tədris və öyrənmə” mövzusunda məruzə ilə çıxış edib. Bildirib ki, son 10 ildə həm cəmiyyətdə, həm tələbə strukturunda, həm də akademiyada çox böyük dəyişikliklərin olması səbəbindən yeni üsulları axtarmaq vacibliyini vurğulayaraq, bu prosesdə mühüm məsələnin transformativ təlimin tədrisi metodları olduğunu söyləyib.

Daha sonra “Dəyişikliklərin idarə edilməsi - transformasiyalı tədris və öyrənmə” mövzusunda işini davam etdirən təlim Ali Təhsildə Keyfiyyət Təminatı Agentliklərinin Mərkəzi və Şərqi Avropa Şəbəkəsinin (CEENQA- Central and Eastern European Network of Quality Assurance Agencies in Higher Education) vitse prezidenti Olgun Çiçek tərəfindən aparılıb. Təlim zamanı ali təhsil müəssisələrində keyfiyyət təminatının tələbləri, təhsil proqramlarının beynəlmiləlləşdirilməsi, dərs proqramlarında keyfiyyət təminatı, beynəlxalq akkreditasiya və onun gələcək perspektivləri, modular akkreditasiya barədə ətraflı məlumat verilib və qeyd olunan məsələlər ətrafında geniş müzakirələr aparılıb.