Türkiyəli professor Yavuz Öztürklər LDU-da praktiki ustad dərslərini davam etdirir
Türkiyənin Qafqaz Universitetinin Baytarlıq fakültəsinin Dölvermə və süni mayalanma kafedrasının tanınmış professoru Yavuz Öztürklər Lənkəran Dövlət Universitetinin Baytarlıq fakültəsində təhsil alan təcrübəçi tələbələrlə növbəti əyani məşğələsini keçirib. Bu məşğələ iki universitet arasındakı beynəlxalq əməkdaşlıq çərçivəsində tələbələrin nəzəri biliklərini real istehsalat şəraitində tətbiq etmək və onların peşəkar vərdişlərini inkişaf etdirmək məqsədi daşıyır.
Tələbələrin böyük maraq göstərdiyi praktiki məşğələdə müasir heyvandarlıq üçün mühüm olan metodlar əyani nümayiş etdirilib. Prof. Dr. Yavuz Öztürklər qeyd edib ki, baytarlıq sırf təcrübəyə əsaslanan bir sahədir və gənclərin regionda heyvandarlığın inkişafına töhfə verə bilməsi üçün əyani vərdişlər minimum nəzəriyyə qədər önəmlidir.
Qeyd edək ki, bu cür ustad dərsləri LDU-nun baytarlıq ixtisası üzrə təhsil alan tələbələrinin beynəlxalq standartlara uyğun, rəqabətədavamlı kadrlar kimi yetişməsinə müsbət təsir göstərir.
