Lənkəran Dövlət Universiteti Qazaxıstanın Xalel Dosmuxamedov adına Atırau Dövlət Universiteti ilə 2023-cü ildən əməkdaşlıq edir və bu əməkdaşlıq müqaviləsinə əsasən 2024/2025-ci tədris ilinin yaz semestrində iki qazaxıstanlı tələbə təhsillərini 1 semestrlik Lənkəran Dövlət Universitetində davam etdirirlər.

Lənkəran Dövlət Universitetinin rektoru, prof. Natiq İbrahimov təhsillərini LDU-da davam etdirəcək həmin tələbələrlə görüşüb.Səmimilik şəraitində keçən görüş zamanı prof. Natiq İbrahimov Qazaxıstan və Azərbaycan dövlətləri arasında olan dostluq əlaqələrindən, LDU nümayəndə heyətinin Qazaxıstana səfərlərindən, dost ölkənin ali təhsil ocaqları ilə bağlanan qarşılıqlı əməkdaşlıq müqavilələrindən, bu ilin martın 4-də ADA Universitetində “Azərbaycan və Qazaxıstan arasında ali təhsildə əməkdaşlığın genişləndirilməsinə” həsr olunmuş “dəyirmi masa”da müzakirə olunan məsələlərdən söz açıb. Rektor qazaxıstanlı tələbələrin Lənkəran Dövlət Universiteti ilə bağlı təəssüratları, qayğı və ehtiyacları ilə maraqlanıb. Qazaxıstanlı tələbə Sabina Ualıyeva LDU-ya gəlişlərindən, təhsillərini burda 1 semestr də olsa davam etdirəcəklərindən məmnun olduğunu bildirib. Diana Abdraşeva burada təhsil almağın tələbələr üçün çox maraqlı ola biləcəyini qeyd edib. Tələbələr dərslərin ingilis dilində tədris olunduğunu və əksər müəllim və tələbələrin rus və ingilis dilini bildiklərindən hər hansı çətinliklə üzləşmədiklərini deyiblər. Söhbət əsnasında qazaxıstanlı tələbələr artıq Azərbaycan dilini də öyrənməyə başladıqlarını bildirərək onlara yaradılan şəraitə, diqqətə və görüşə görə rektor, prof. Natiq İbrahimova minnətdarlıq bildiriblər.

Sonda xatirə şəkilləri çəkilib.

Qeyd edək ki, rektor Natiq İbrahimov qazaxıstanlı tələbələrə LDU-nun təsis etdiyi təqaüdün verilməsi haqqında əmr imzalayıb.