5 Oktyabr-Beynəlxalq Müəllimlər Günü ən şərəfli, müqəddəs peşə sahibləri olan müəllimlərin bayramıdır. Müəllim ən böyük bağbandır, sönməyən günəşdir, yanar ürəkdir. “Mən dünyada müəllimdən yüksək ad tanımıram”(H. Əliyev), “Müəllimlik, hər şeydən əvvəl, bir Tanrı sənətidir”(Platon), “Dünyada hər şeyə dəyər vermək mümkündür, lakin müəllimin əməyinə əsla dəyər verilə bilməz” (Sokrat).

Əsrlər boyu xalqımızın şərəfli missiya daşıyıcıları olan müəllimlər tərəqqiyə, inkişafa, milli rifaha zəmin yaradıb, gələcəyin yolunu müəyyən ediblər. Müəllim sözü həmişə kamillik, ləyaqət, bütövlük simvolu kimi mənəvi keyfiyyətləri ifadə edib və bu dəyərlərin işığında yetişən nəsillər hər zaman öz layiqli müəllimlərinə bənzəməyə çalışıblar.

Ulu öndər Heydər Əliyevin sözü ilə desək: “Özünü müəllimliyə həsr etmiş insan ən şərəfli insandır”. Bu gün böyük fəxr və iftixar hissi ilə deyə bilərik ki, məhz müəllim ordusunun mübariz, vətənpərvər ruhda yetişdirdiyi gənc nəsil torpaqlarımızın erməni işğalçılarından azad edilməsi uğrunda əzm və dəyanətlə döyüşdü, qanı və canı bahasına 30 ilə qədər düşmən tapdağında qalan yurd yerlərimizi azad etdi, Qarabağ nisgilimizə son qoydu, indi də həmin torpaqları göz bəbəyi kimi qoruyur, abadlaşdırır. Zəfər savaşında canlarından keçən qəhrəman şəhid təhsil işçilərimizi bu gün bir daha ehtiramla yad edir, qazilərimizə can sağlığı arzulayıram.

Bu gün Azərbaycan müəlliminə böyük dəyər verilir. Bunun sayəsində son illər ölkəmizdə daha hazırlıqlı, daha istedadlı şəxslərin müəllim peşəsinə gəlməsi bizi bu hədəfimizi genişləndirməyə, gələcəyin memarı olan müəllimin inkişafına diqqəti daha da artırmağa səfərbər edir. Çox böyük qürur hissi ilə bildirirəm ki, Lənkəran Dövlət Universitetində, universitetimizin nəzdindəki Sosial və Aqrar-Texnoloji Kollecdə hazırlanan kadrlar öz səviyyəsinə, peşəkarlığına, ən əsası, vətənpərvərliyinə görə daim seçilir. Prezident İlham Əliyev tərəfindən qarşıya qoyulan vəzifə isə belədir ki, Azərbaycan təhsili ən yüksək tələblərə cavab verməlidir: “Təhsil sahəsində bu günə qədər aparılan islahatlar daha da dərinləşməlidir. Təhsil ölkəmizin ümumi inkişafına uyğun şəkildə inkişaf etməlidir və ən müasir tələblərə cavab verməlidir”.

Əziz müəllimlər, bu gün sizin bayramınız, sizin gününüzdür. 5 Oktyabr – Beynəlxalq Müəllimlər Günü münasibətilə Lənkəran Dövlət Universitetinin və universitetin nəzdindəki Sosial və Aqrar-Texnoloji Kollecin pedaqoji kollektivini, professor-müəllim heyətini, müəllimlik ixtisasında təhsil alan tələbələri ürəkdən təbrik edir, şəxsi həyatlarında və pedaqoji fəaliyyətlərində uğurlar arzulayıram.

Bayramınız mübarək!