Lənkəran Dövlət Universitetində (LDU) “Müasir təlim texnologiyalarının tətbiq olunmasının təhsilin keyfiyyətinə təsiri” mövzusunda gənc tədqiqatçıların respublika elmi-praktik konfransı öz işinə başlayıb.Konfrans dövlət himnimizin ifası ilə start götürüb.

LDU ilə yanaşı, ölkənin aparıcı ali təhsil müəssisələrindən, elmi mərkəzlərdən, müxtəlif təşkilatlardan nümayəndələrin, görkəmli alimlərin qatıldığı konfransı Lənkəran Dövlət Universitetinin rektoru vəzifəsini icra edən profesor Natiq İbrahimov açıb.Natiq İbrahimov rəhbərlik etdiyi ali məktəbdə son illərdə keçirilmiş müxtəlifyönümlü beynəlxalq və respublika miqyaslı elmi konfranslar barədə iştirakçılara məlumat verib. Bildirib ki, bugünkü konfransın keçirilməsində əsas məqsəd müasir təlim texnologiyalarının tədbiq olunmasının təhsilin keyfiyyətinə təsirini öyrənmək, mövzuya gənc tədqiqatçıların elmi yanaşmasını təhlil etmək, müxtəlif elm sahələrinə təsirini müzakirə etmək,elmi nəticələrin tədbiqinə nail olmaqdır.Universitet rəsmisi ali təhsil ocaqlarında gənc tədqiqatçılar üçün optimal şəraitin yaradılmasını,modern laboratoriyaların quraşdırılmasını elmi inkişafın əsas amili kimi dəyərləndirib və bu istiqamətdə LDU-da görülən işlərdən danışıb.

Konfransda LDU-nun tədrisin təşkili və təlim texnologiyaları üzrə prorektoru vəzifəsini icra edən dosent İdrak Əsgərov “Müasir təlim texnologiyalarının tətbiq olunmasının təhsilin keyfiyyətinə təsiri” mövzusunda geniş məruzə edib.Məruzəçi qeyd edib ki,təhsilin keyfiyyət səviyyəsi hər bir tarixi mərhələdə ictimai-siyasi,sosial –iqtisadi,elmi-mədəni inkişafla bağlı tələblərdən irəli gəlir.İdrak Əsgərov Lənkəran Dövlət Universitetinin timsalında bu istiqamətdə görülən işlər və perspektiv planlar barədə iştirakçılara ətraflı məlumat verib.

BDU- nun Fiziki coğrafiya kafedrasının müdiri, professor Yaqub Qəribov müasir təlim texnologiyalarının tədbiqinin təhsilin inkişafına göstərdiyi müsbət təsiri çalışdığı və səfər etdiyi xarici ölkələrin təcrübəsi əsasında şərh edib.

Məruzə ətrafında çıxışlardan sonra konfrans iştirakçıları adından prezident İlham Əliyevə müraciət qəbul olunub.

Gün ərzində konfrans işini plenar iclaslarda davam etdirəcək.Qeyd edək ki,bu gün IV bölmə üzrə 130-dan artıq tezisin dinlənilməsi nəzərdə tutulub.

Konfransa günün sonunda yekun vurulacaq və fərqlənənlərə sertifikatlar təqdim olunacaq.

Esmira İsmayılova

LDU-nun mətbuat xidmətinin rəhbəri.