Azərbaycan Respublikası Təhsil Nazirinin 16.08.2018-ci il 564 saylı əmrinə əsasən, Lənkəran şəhər təhsil şöbəsinin müraciəti nəzərə alınaraq , sözügedən nazirliyin “Ümumi və ali təhsil müəssisəsi əməkdaşlığı üzrə pilot layihənin tətbiqi barədə” 27 noyabr 2017-ci il tarixli 423 nömrəli əmrində dəyişiliklik edilib.Dəyişikliyə əsasən,2018-2019-cu tədris ilində Lənkəran Dövlət Universiteti (LDU) Astara və Yardımlı rayonları ilə yanaşı, Lənkəran şəhərinin tam orta məktəbləri ilə də əməkdaşlıq edir.

Bu gün pilot layihəyə uyğun olaraq, tərtib edilmiş cədvəl əsasında Lənkəran şəhər 10 saylı tam orta məktəbin yuxarı sinif şagirdləri üçün kimya və biologiya fənnlərindən nümunəvi açıq dərslər keçirilib.Sözügedən məktəbin kimya təmayüllü XI sinif şagirdləri üçün Lənkəran Dövlət Universitetinin kimya laboratoriyasında kimya fənnindən ”Atomun quruluşu və hibridləşmə haqqında” nümunəvi açıq dərsi kimya və fizika kafedrasının müdiri, kimya üzrə fəlsəfə doktoru, dosent İsa Hüseynov və kafedranın müəllimi Tərlan Ağazadə təqdim ediblər.

Yanaşı olaraq universitetin biologiya laboratoriyasında 10 saylı tam orta məktəbin texniki və təbiyyat təmayüllü X sinif şagirdləri üçün biologiya fənnindən “İrsən keçmənin qanunauyğunluqları” mövzusunda keçirilən açıq dərsi bilogiya və tibbi biliklər gafedrasının müəllimi, biologiya üzrə fəlsəfə doktoru , dosent Məhəmmədhüseyn Hüseynov aparıb.Açıq dərslərdə nəzəri bilgilərlə yanaşı, şagirdlərə praktiki vərdişlər də aşılanıb, şagirdləri maraqlandıran suallar cavablandırılıb.

Qeyd edək ki, LDU-da fəaliyyət göstərən “Biologiya və tibbi biliklər” kafedrasının nəzdində Biologiya tədris laboratoriyası və “Kimya və fizika” kafedrasının nəzdində Kimya tədris laboratoriyası 2016 /2017-ci tədris ilində yaradılmışdır və Almaniyanın PASCO şirkətinin rəqəmsal avadanlığı ilə təmin edilmişdir. Hər bir laboratoriyada həm biologiyadan, həm də kimyadan 15-dən artıq laboratoriya işini həyata keçirmək mümkündür. Bu laboratoriyaların hər biri müasir kompyuterlərlə təchiz olunub və həmin kompyuterlərə icra ediləcək laboratoriya işlərinin proqram təminatı yazılıb. Fotosintez prosesini, havanın nəmliliyini, ürək fəaliyyətini, üzvü və qeyri üzvi maddələrin müxtəlif xassələrini və s . laboratoriya işlərini öyrənmək imkanı verən laboratoriyalarda analitik ölçmələr aparmaq, maddələrdən endotermik və ekzotermik istiliyin ayrilmasi və udulmasi ilə gedən reaksiyalari izləmək mümkündür. Ağıllı lövhə ilə təchiz olunmuş laboratoriyalarda təcrübi işləri aparan tələbə-gələcək müəllim orta məktəbdə müxtəlif siniflərdə biologiya və kimya fənnlərinin tədris edilməsində böyük üstünlüyə malik olacaqdir.

Növbəti günlərdə nümunəvi dərslərlə paralel olaraq,orta məktəb şagirdləri üçün laboratoriya məşğələləri də keçiriləcək, şagirdlərə biologiya və kimya fənnlərindən ən vacib təcrübi biliklər aşılanacaq, onlar müasir laboratoriya avadanlıqları ilə tanış ediləcək, lazımi bilgiləri ala biləcəklər.

Məlumat üçün deyək ki, layihənin ilkin mərhələsində Lənkəran şəhər 7, 9, 10 saylı tam orta məktəblərin və Xarici Dillər Təmayüllü Gimnaziyanın yuxarı sinif şagirdləri fevral ayının 13-nə kimi bu imkandan bəhrələnə biləcəklər. Sonrakı mərhələlərdə digər məktəblərin şagirdlərinə də universitetin tədris bazasından yararlanmaq imkanı yaradılacaq.